Act 6 | YML | STEP | 'Aiata 'aitamogana 'aitamogana tovetumaganavo 'adi 'aila'a i vevebwaika, siwe 'ifwaidi i nuavita yadi 'wabu'wabulavo faifaidi. Tovetumaganavo 'ifwaidi me Guliki i vonavona i vo, 'Aiata 'aitamogana 'aitamogana tomata'aulelevo 'ani'ani 'wabu'wabulavo i velevelediga, yama 'wabu'wabulavo 'adi 'anivelena siaina, we'e me Ibeliu yadi 'wabu'wabulavo 'adi veuveuta bwaikina.”

Acts 6

To'aivaita 'adi 7 i venua'ivinedi.

1 'Aiata 'aitamogana 'aitamogana tovetumaganavo 'adi 'aila'a i vevebwaika, siwe 'ifwaidi i nuavita yadi 'wabu'wabulavo faifaidi. Tovetumaganavo 'ifwaidi me Guliki i vonavona i vo, 'Aiata 'aitamogana 'aitamogana tomata'aulelevo 'ani'ani 'wabu'wabulavo i velevelediga, yama 'wabu'wabulavo 'adi 'anivelena siaina, we'e me Ibeliu yadi 'wabu'wabulavo 'adi veuveuta bwaikina.” 2 Faifainanina tomata'aulelevo 'adi 12 tovetumaganavo matatabudi i goledi i va'auta taiadi i veifufu i vo, Yama folova mogitana Yaubada yana Vona 'a na lalau'age. Kebu i da lubwainema folovanina 'a na baileni we'e 'ani'ani 'a na 'i'isave'avini. 3 Faifainanina side bani'odi emavo, 'waimiega tomotoga 'adi 7 'wa na venua'ivinedi, tomotoganidi ma yadi 'aseta bwaikina wata 'Anu'anunu 'Atumaina i agedi mogitana. Taunidi yadi folova, 'a na veimeyedi 'ani'ani i na 'i'isave'avini. 4 We'e 'ima tutuya fuedi yama folova 'a na lalau'age wata 'a na vevelu'ui Yaubada 'waineye.”

5 Tovetumagananidi matatabudi i sosoana tomata'aulelevo yadi nuanua faifaina. Begaidi Sitiveni i venua'ivineni, taunina tovetumagana toketokena, wata 'Anu'anunu 'Atumaina i agei mogitana. Wata 'ifwaidi Sitiveni bani'odi i venua'ivinedi. 'Adi wagava:

Filifi,

Filikolo,

Nikanoli,

Taimoni,

Falimina,

Nikola, tomogo Anitioki, basenadi i ve-Diu, mulieta i vetumagana Iesu 'waineye.

6 Tovetumaganavo tomotoganidi 'adi 7 i miedi tomata'aulelevo 'waidie, bega tomata'aulelenidi i velu'ui faifaidi, wata nimadi i yatodi 'unu'unudie bega Yaubada i na nuakalikaliedi wata i na 'ivaisedi yadi folova 'waidie.

7 Yaubada yana Vona i yavula tomotoga fuedi 'waidie. Tovetumaganavo 'adi 'aila'a Ielusalema nageneye i vebwaika-'afo'afo, wata me Diu yadi tovelomu fuedi i vetumagana Iesu 'waineye.

S6 Fol 13:3S7 Fol 16:5

Sitiveni 'ana 'ive'avina.

8 Yaubada ma yana nuakalikali i vevesauluva 'atumaina Sitiveni 'waineye wata toketokena i veleni bega 'eba nuavogana wata 'eba 'isa toketokedi i 'i'idewadi tomotoga matadie. 9 Tamu me Diu yadi 'eba miava'auta 'ana wagava Yavuyavudi Folova-maimaiga 'Wainega, 'eba miava'autanina 'ana tomotoga 'ifwaidi i maia Sitiveni taiadi i ve'ikwayekwayega. Tomotoganidi taunidi Diu, 'ifwaidi i maia Sailini wata Alekisanidilia 'waidiega, wata 'ifwaidi Silisia wata Eisia 'waidiega. 10 Tutuyanina i veve'ikwayekwayega, 'Anu'anunu 'Atumaina 'aseta bwaikina Sitiveni i veleni bega kebu 'adi fata yana vona i na tutuli.

11 Faifainanina tomotoganidi givagivayega i nagoi mali tomotoga i tutulidi bega i na lu'ivona-vekavekali tovelomu 'waidie Sitiveni faifaina. Tolu'ivonanidi i nagoi Diu yadi to'edakumetavo 'au'auveadi, ve'etoboda 'adi tovevo, wata mali tomotoga 'waidie i vekali i vo, 'A nogai Sitiveni i vona-awadamana Yaubada wata Mosese 'waidie.” To'edakumetanidi tovekali yadi vona i nogai ma yadi nuasako i nagoi Sitiveni i 'ive'avini i mieni Diu yadi kaniselovo 'waidie. 13 Kaniselovo tovekali i goledi i luku 'waidie i vekali Sitiveni faifaina, igodina i da vo, 'A nogai tutuya fuedi i vona-awadamana Yaubada yana vanuga 'eba velu'ui wata yada ve'etoboda Mosese i veledaga 'waidie. 14 Wata tamu yana vona 'a nogai i vo, Iesu Nasalediega yada vanuga 'eba velu'ui i na geuya wata yada sauluva matatabuna i maiga Mosese 'wainega i na siviladi i na vetuli.” 15 Matatabudi i miamiani kaniselovo yadi tutudaba nageneye Sitiveni i 'isadewai, i 'iseni 'ana 'isa'isa i vetuli, maigina mataududulina bani'odi tamu anelose.

S10 Luk 21:15S11 Mad 26:60,61